आर्थिक देवाण-घेवाणीतून महिलेचे अपहरण : तासगाव, सांगली, जयसिंगपूर येथील ११ जणांवर गुन्हा; तिघांना अटक
बड्या नेत्याच्या तत्कालीन पीएचा समावेश
सांगली : खरा पंचनामा
कर्ज देण्याच्या आर्थिक देवाण-घेवाणीतून सांगलीतील संजोग कॉलनीतील महिलेचे अपहरण करण्यात आले. तिला मिरजेत नेऊन बेदम मारहाण करण्यात आली. गुरुवारी रात्री साडेआठच्या सुमारास ही घटना घडली. याप्रकरणी सांगली शहर पोलिसांनी तासगाव, सांगली आणि जयसिंगपूर येथील तब्बल अकरा जणांवर गुन्हा दाखल केला आहे. यातील तिघांना अटक करण्यात आली आहे. शिवाय गुन्ह्यात वापरलेल्या दोन कार जप्त करण्यात आल्या आहेत. सांगली शहरचे प्रभारी निरीक्षक शिवाजीराव गायकवाड, सहायक निरीक्षक समीर ढोरे यांनी ही कारवाई केली. दरम्यान अटक करण्यात आलेल्यापैकी एकजण बड्या नेत्याचा तत्कालीन पीए होता अशी चर्चा आहे. तर एकजण ठाकरे गटाच्या शिवसेनेचा तासगाव येथील पदाधिकारी असल्याचे समजते.
याप्रकरणी पोलिसांनी अभिजित दिलीप पाटील (वय ३०, रा. तासगाव), श्रीकांत शिवाजी कोकळे (वय ४०, रा. उमदी, ता. जत), विशाल गोविंद शिंदे (वय ३९, रा. कासार गल्ली, तासगाव) अशी अटक केलेल्यांची नावे आहेत. तर अतुल अशोक काळे (वय २९, रा. गणपती पेठ, सांगली), अमर गोरख खोत (वय ३६, रा. संजयनगर, सांगली), श्रीकांत आप्पासो गायकवाड (वय ३०, रा. तासगाव), मनोज नारायण चव्हाण (वय ३२, रा. कोल्हापूर रोड, सांगली), सुशांत नंदकुमार पैलवान (वय ३२, रा. तासगाव), सुयोगराज चंद्रकांत वेल्लार (वय ३७, रा. स्टॅंडजवळ, सांगली), आरीफमहमद बाबासाहेब आत्तार (वय ३८, रा. शाहुनगर, जयसिंगपूर), शीतल गोरख भजबळे (वय ३९, रा. संजयनगर, सांगली) अशी गुन्हा दाखल झालेल्यांची नावे आहेत. याप्रकरणी शिवराज संजय पाटील (वय ३६, रा. संजोग कॉलनी, सांगली) यांनी फिर्याद दिली आहे.
आर्थिक वादातून गुरुवारी रात्री साडेआठच्या सुमारास सर्व संशयित तीन कारमधून पाटील यांच्या घरी गेले. तेथे आम्ही एलसीबीचे लोक आहोत असे सांगून स्वाती संजय पाटील (वय ५८) यांना जबरस्तीने गाडीत घालून घेऊन गेले. तेथून संशयितांनी त्यांना मिरजेत नेले. तेथे नेऊन त्यांना बेदम मारहाण करण्यात आली. याप्रकरणी शिवराज पाटील यांनी शुक्रवारी सकाळी सांगली शहर पोलिस ठाण्यात फिर्याद दिली. त्यानुसार शहर पोलिसांनी तात्काळ हालचाली करत अभिजित पाटील, श्रीकांत कोकळे, विशाल शिंदे यांना अटक केली. तसेच त्यांनी गुन्ह्यात वापरलेली स्विफ्ट कार (एमएच १० डीजी ४३०२), स्कोडा (एमएच ०८ झेड ३८३८) जप्त केली आहे. यात वापरलेली आणखी एक एमजी हेक्टर कारचा पोलिस शोध घेत आहेत. सांगली शहर पोलिस ठाण्याचे प्रभारी निरीक्षक शिवाजीराव गायकवाड यांच्या मागर्दशर्नाखाली सहायक निरीक्षक समीर ढोरे यांच्या पथकाने ही कारवाई केली.
दरम्यान यातील संशयित अभिजित पाटील हा जिल्ह्यातील एका बड्या नेत्याचा तत्कालीन पीए होता अशी चर्चा आहे. तर विशाल शिंदे हा शिवसेना ठाकरे गटाचा तासगाव येथील पदाधिकारी असल्याचे सांगण्यात येत आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
