25 जणांचा बळी घेणारी ती बस पोलिस अधिकाऱ्याच्या पत्नीच्या नावे!
नागपूर : खरा पंचनामा
समृद्धी महामार्गावर 'विदर्भ ट्रॅव्हल्स'च्या ज्या बसने 25 जणांचा बळी घेतला, ती बस यवतमाळ जिल्ह्यातील एका पोलीस अधिकाऱ्याच्या पत्नीच्या नावे आहे. पूर्वी वाहतूक शाखेत कार्यरत असलेल्या या पोलीस अधिकाऱ्याने पत्नीच्या नावे बस खरेदी करून प्रवाशी वाहतुकीचा व्यवसाय सुरू केला होता, असे समजते.
प्रगती भास्कर दरणे असे बस मालकाचे नाव आहे. भास्कर दरणे हे यवतमाळ पोलीस दलात पोलीस उपनिरीक्षक पदावर कार्यरत आहेत. ते पूर्वी वाहतूक शाखेत असताना ट्रॅव्हल्स पॉईटवर कर्तव्य बजावत होते. त्यामुळे खासगी बस विकत घेऊन प्रवाशी वाहतूक व्यवसाय करण्याची त्यांना कल्पना सूचली. त्यांनी पत्नी प्रगती यांच्या नावावर (एमएच 29 बीई 1819) बस विकत घेतली. विदर्भ ट्रॅव्हल्सचे संचालक वीरेंद्र दरणे यांच्याकडे ती वाहतुकीसाठी दिली.
त्यावेळी पोलीस दलात कार्यरत कर्मचाऱ्यांच्या खासगी बस लांब पल्ल्यावर धावत लाखोंचा व्यवसाय करीत असून पोलिसांचा या बसेसला आशीर्वाद असल्याची चर्चा दोन वर्षांपूर्वी झाली होती. ती अपघातग्रस्त खासगी बस २०२० मध्ये खरेदी करण्यात आली होती. लॉकडाऊनच्या काळात बस वर्षभर उभीच होती.
बसच्या कागदपत्रांसह फिटनेस प्रमाणपत्रही असल्याचे त्यांचा दावा आहे.
विदर्भ ट्रॅव्हल्सची बस नागपूरवरून निघाल्यानंतर शनिवारी मध्यरात्रीनंतर सिंदखेड राजा येथे अपघात झाला. ही बस जळून खाक झाली आणि तब्बल २५ प्रवाशांचा बळी त्या बसने घेतला. पोलीस अधिकाऱ्याच्या पत्नीच्या नावावर असलेल्या या बसची पीयूसीसुद्धा संपलेली होती, अशी चर्चा आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
