मराठा आरक्षणासाठी शिंदे गटाचे खासदार हेमंत पाटील यांचा तडकाफडकी राजीनामा!
हिंगोली : खरा पंचनामा
मराठा आरक्षणाच्या मागणीसाठी शिवसेनेच्या खासदाराने आपल्या पदाचा राजीनामा दिला आहे. शिवसेनेच्या शिंदे गटाचे हिंगोलीचे खासदार हेमंत पाटील यांनी आपल्या खासदारकीचा राजीनामा दिला आहे. लोकसभा अध्यक्षांना पत्र लिहून हेमंत पाटील यांनी आपल्या खासदारकीचा राजीनामा दिला आहे.
मराठा आरक्षणाच्या मुद्द्यावर आक्रमक होत मराठा बांधवांनी खासदार हेमंत पाटील यांना घेराव घालून त्यांच्या राजीनाम्याची मागणी केली आणि त्यानंतर खासदार पाटील यांनी आपला राजीनामा लोकसभा अध्यक्षांच्या नावाने लिहिला आहे. यवतमाळच्या पोफाळी येथील वसंत सहकारी साखर कारखाना येथे खासदार पाटील आले असता त्यांना मराठा आंदोलकांनी घेराव घातला.
यावेळी आमदार खासदारांविरोधात जोरदार घोषणाबाजी करण्यात आली. मराठा आरक्षणप्रश्नी आपण दिल्ली येथे खासदारांची बैठक बोलाविली मात्र मराठा बांधवांची मागणी असेल तर एक मिनिटात राजीनामा देतो असे खासदार पाटील यांनी यावेळी सांगितले आणि लगेचच लोकसभा अध्यक्षांच्या नावे आपला राजीनामा लिहिला.
हेमंत पाटील यांनी लोकसभा अध्यक्षांच्या नावे लिहिलेल्या पत्रात म्हटलं, मा. लोकसभा अध्यक्ष, सस्नेह जय महाराष्ट्र.... महाराष्ट्रात मराठा समाजाच्या आरक्षणाचा विषय अनेक वर्षांपासून प्रलंबित आहे. या विषयावर समाजाच्या भावना अतिशय तिव्र असून मी अनेक वर्षांपासून मराठा समाजासाठी शेतकऱ्यांसाठी भांडणारा कार्यकर्ता आहे. आरक्षणाच्या आंदोलनासाठी माझा पाठिंबा असून आरक्षणासाठी मी माझ्या पदाचा राजीनामा देत आहे.
शिवसेनेचे हिंगोलीचे खासदार हेमंत पाटील यांनी आपल्या खासदारकीचा राजीनामा दिला आहे. इतकेच नाही तर आपण मराठा समाजाच्या आरक्षणाच्या मागणीसाठी दिल्लीत उपोषण करणार असल्याचंही त्यांनी माध्यमांना सांगितले आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
