अखेरचा लाल सलाम! कम्युनिस्ट पक्षाचे ज्येष्ठ नेते सिताराम येचुरी यांचं निधन
नवी दिल्ली : खरा पंचनामा
मार्क्सवादी कम्युनिस्ट पक्षाचे ज्येष्ठ नेते सीताराम येचुरी यांचं निधन झालं आहे. गेल्या अनेक दिवसांपासून ते आजारी होते. अखेर रुग्णालयात उपचारांदरम्यान त्यांची प्राणज्योत मालवली, ते ७२ वर्षांचे होते. दिल्लीच्या एम्स रुग्णालयात त्यांच्यावर उपचार सुरु होते.
श्वसनाचा त्रास होत असल्यानं त्यांना रुग्णालयात दाखल करण्यात आलं होतं. १९ ऑगस्टपासून दिल्लीच्या AIIMS रुग्णालयात त्यांच्यावर उपचार सुरू होते. मार्क्सवादी कम्युनिस्ट पक्षाच्या सुत्रांनी येचुरी यांचं उपचारांदरम्यान निधन झाल्याच्या वृत्ताला पुष्टी दिली आहे. पीटीआयनं याबाबत वृत्त दिलं आहे.
सीताराम येचुरी यांचा तमिळ ब्राह्मण कुटुंबातून जन्म झाला. १९७४ मध्ये स्टुडेंट्स फेडरेशन ऑफ इंडियामध्ये (एसएफआय) सहभागी झाले होते. एका वर्षानंतर ते भारतीय कम्युनिस्ट पार्टीचे (मार्क्सवादी) सदस्य झाले होते. दिल्लीतील प्रसिद्ध जवाहरलाल नेहरु विद्यापीठात अर्थात जेएनयूत शिकत असताना त्यांची राजकीय जडण घडण झाली. इथं डाव्या विचारसरणीचा प्रसार करण्यामध्ये त्यांची महत्त्वाची भूमिका होती.
सिताराम येचुरी यांनी अर्थशास्त्रात मास्टर्स केली आहे. आणीबाणीच्या काळात त्यांना अटक करण्यात आली होती, त्यामुळं त्यांची पीएचडी पूर्ण होऊ शकली नव्हती. कोरोनाच्या काळात विषाणूची लागण झाल्यामुळं त्यांच्या मोठ्या मुलाचा (वय ३५) मृत्यू झाला होता.
२००५ मध्ये सिताराम येचुरी हे पश्चिम बंगालमधून राज्यसभेवर खासदार झाले. १८ ऑगस्ट २०१७ पर्यंत ते खासदार होते. त्यांना संसदपटू म्हणून देखील पुरस्कार मिळाला आहे. त्यांनी संसदेत अनेक जनहिताचे मुद्दे उपस्थित केले. येचुरी हे सामाजिक कार्यकर्ते, लेखक, पत्रकार, अर्थतज्ज्ञ आहेत. त्यांनी काही पुस्तके लिहिली आहेत.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
