हेरवाडजवळ गोवा बनावटीची दारू जप्त
पिकअपसह दहा लाखांचा मुद्देमाल जप्त, कुरूंदवाड पोलिसांची कारवाई
जयसिंगपूर : खरा पंचनामा
शिरोळ तालुक्यातील हेरवाडजवळ बोरगाव रस्त्यावर गोवा बनावटीच्या दारूची अवैध वाहतूक करणारा पिकअप टेम्पो पकडून पाच लाखांच्या दारूसह दहा लाखांचा मुद्देमाल जप्त करण्यात आला. दारूची तस्करी करणाऱ्या सावंतवाडी येथील एकाला अटक करण्यात आल्याची माहिती कुरूंदवाडचे प्रभारी सहायक पोलिस निरीक्षक रविराज फडणीस यांनी दिली.
रामा बाळा लोकरे (वय ३६, रा. सावंतवाडी, ता. सिंधुदुर्ग) असे अटक केलेल्या दारू तस्कराचे नाव आहे. अवैध दारू विक्री, वाहतूक, तस्करी करणाऱ्यांवर कारवाई करण्यासाठी कुरुंदवाडचे प्रभारी सहायक निरीक्षक फडणीस यांनी गुन्हे प्रकटीकरण पथकाला सूचना दिल्या होत्या. सोमवारी दुपारी एका पिकअप टेम्पोमधून गोवा बनावटीची दारूची तस्करी होत असल्याची माहिती श्री. फडणीस यांना खबऱ्याद्वारे मिळाली होती. त्यांनी पथकाला कारवाईच्या सूचना दिल्या होत्या.
पथक बोरगाव-हेरवाड रस्त्यावरील पाचवा मैल परिसरात गस्त घालत होते. त्यावेळी मिळालेल्या माहितीप्रमाणे पिकअप टेम्पो (एमएच ०९ जीजे १०५४) हेरवाडजवळ आल्यानंतर पथकाने तो अडवला. टेम्पोची तपासणी केल्यानंतर त्यामध्ये सुरुवातील काहीच आढळले नाही. नंतर सहायक निरीक्षक फडणीस यांनी बारकाईने तपासणी केल्यानंतर टेम्पोमध्ये विशेष कप्पे तयार करून त्यामधून गोवा बनावटीच्या दारूचे बॉक्स आढळले. या टेम्पोतून गोवा बनावटीच्या दारूचे १२० बॉक्स जप्त करण्यात आले. त्याची किंमत पाच लाख चार हजार इतकी आहे. त्यानंतर टेम्पोचालक लोकरे याला अटक करून टेम्पोसह दारू असा एकूण १० लाख चार हजारांचा मुद्देमाल जप्त केला.
कुरूंदवाडचे प्रभारी सहायक पोलिस निरीक्षक रविराज फडणीस यांच्या मार्गदर्शनाने उपनिरीक्षक सागर पवार, बाळासो कोळी, संतोष साबळे, पोपट ऐवळे, नितीन साबळे, सागर खाडे, सचिन पुजारी, रविंद्र पाटील आदींच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
