सांगलीत घरफोडी करणाऱ्या तरुणाला अटक
10 लाखांचे दागिने जप्त, शहर पोलिसांची कारवाई : अधीक्षक घुगे
सांगली : खरा पंचनामा
सांगली शहरातील जामवाडी येथील घर फोडून दागिने लंपास करणाऱ्या तरुणाला अटक करण्यात आली आहे. त्याच्याकडून चोरलेले 10 लाखांचे सर्व दागिने जप्त करण्यात आले आहेत. शहर पोलिसांनी कौतुकास्पद कामगिरी केल्याची माहिती पोलीस अधीक्षक संदीप घुगे यांनी दिली.
योगेश अनिल जाधव (वय 36, रा. कबाडे हॉस्पिटलजवळ, कोल्हापूर रोड, सांगली) असे अटक केलेल्याचे नाव आहे. दि. 1 ते 15 नोव्हेंबर दरम्यान जामवाडी येथील अनिरुद्ध सूर्यवंशी यांचे घर फोडून दागिने लंपास करण्यात आले होते. यातील संशययितांना पकडण्याच्या सूचना शहरचे वरिष्ठ पोलीस निरीक्षक संजय मोरे यांनी गुन्हे प्रकटीकरण शाखेला दिले होते. पथक चोरटयांचा शोध घेत होते.
पथकातील संतोष गळवे, गौतम कांबळे यांना एकजण चोरीचे दागिने विक्री करण्यासाठी आकाशवाणी केंद्रामागे येणार असल्याची माहिती खबऱ्याद्वारे मिळाली. पथकाने तेथे सापळा रचून जाधव याला ताब्यात घेतले. त्याची तपासणी केल्यावर त्याच्या पँटच्या खिशात सोन्याच्या बांगडया सापडल्या. त्याबाबत कसून चौकशी केल्यावर त्याने जामवाडी येथील एका घरातून त्या चोरल्याची कबुली दिली. त्याला अटक करून त्याच्याकडून 100 ग्रॅम वजनाचा सोन्याचा गोफ, 85 ग्रॅम वजनाच्या 6 सोन्याच्या बांगडया, 15 ग्रॅमची चेन असा 10 लाखांचा मुद्देमाल जप्त करण्यात आला.
सांगली शहरचे वरिष्ठ पोलीस निरीक्षक संजय मोरे यांच्या मार्गदर्शनाने उपनिरीक्षक महादेव पोवार, संदीप पाटील, संतोष गळवे, गौतम कांबळे, योगेश सटाले, गणेश कोळेकर, संदीप कुंभार, संदीप कोळी, दिग्विजय साळुंखे, कॅप्टन गुंडवाडे आदींच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
