नशेची इंजेक्शन्स प्रकरणी आंतरजिल्हा रॅकेट उघड, सोलापुरातील चार तर सांगलीतील दोघांना अटक
आतापर्यंत नऊ जणांना अटक, महात्मा गांधी चौक पोलिसांची कारवाई
सांगली : खरा पंचनामा
नशेची इंजेक्शन्स प्रकरणी महात्मा गांधी पोलिसांनी आता आंतरजिल्हा कनेक्शन उघडकीस केले असून सोलापूर जिल्ह्यातील चार एजंटांना अटक करण्यात आली तर सांगलीवाडी आणि कडेगावमधीलही दोन एजंटांना ताब्यात घेण्यात आले. याप्रकरणी आतापर्यंत नऊ जणांना पोलिसांनी गजाआड केले आहे. हे संशयित एजंट सांगलीतील मेडिकल चालकाकडून इंजेक्शन घेत असल्याचे तपासात समोर आले आहे.
वैभव ऊर्फ प्रशांत शिवाजी पाटोळे (वय २७, रा. कडेगाव, सांगली), ऋतुराज आबासाहेब भोसले (वय २७, रा. सांगलीवाडी, सांगली), अमोल सर्जेराव मगर (वय २८, रा. निमगाव, ता. माळशिरस, सोलापूर), साईनाथ सचिन वाघमारे (वय १९, निमगाव, ता. माळशिरस, सोलापूर), अविनाश पोपट काळे (वय २२, रा. विझोरी, ता. माळशिरस, सोलापूर आणि देविदास शिवाजी घोडके (वय ३३, रा. माळशिरस, सोलापूर) अशी अटक केल्यांची नावे आहेत. तर यापूर्वी रोहित कागवाडे, ओंकार मुळे आणि अशपाक पटवेगार यांना अटक करण्यात आली होती.
सांगली शहरात वैद्यकीय वापरासाठी असणाऱ्या मेफेनटर्माइन या इंजेक्शनचा नशेसाठी वापर होत असल्याची माहिती पोलिसांना मिळाली होती. तसेच या इंजेक्शनची तस्करी करणारा एकजण इंजेक्शन विक्रीसाठी सांगली येणार असल्याची माहिती मिळाल्यानंतर छापा टाकून संशयितांना अटक केली होती. यापूर्वी तिघांना अटक करून १५ लाख रुपयांचे १ हजार ५०० मेफेटर्माइन इंजेक्शनचा साठा जप्त करण्यात आला होता. महात्मा गांधी चौक पोलीस ठाण्याचे प्रभारी सहायक निरीक्षक संदीप शिंदे यांच्या पथकाने ही कारवाई केली.
दरम्यान, याची पाळेमुळे खणण्याचे आदेश अधीक्षक संदीप घुगे यांनी दिले. त्यानुसार पथकाकडून कसून चौकशी केली जात होती. याप्रकरणी चौकशी केल्यानंतर सांगली जिल्ह्यातील वैभव पाटोळे, ऋतुराज भोसले हे देखील या टोळीत सक्रिय असल्याची माहिती मिळाली. तसेच अमोल मगर, साईनाथ वाघमारे, अविनाश काळे आणि देविदास घोडके या संशयितांनी मेफेनटर्माइन इंजेक्शन घेऊन त्याचा साठा करून सोलापूर जिल्ह्यात त्याची विक्री केल्याचे निष्पन्न झाले. त्यामुळे त्यांना देखील महात्मा गांधी चौक पोलिसांनी अटक केली आहे.
सांगली जिल्ह्यातील मेफेटर्माइन इंजेक्शनच्या तस्करीचे लोन आता आंतरजिल्हा पसरल्यामुळे याबाबत अधिक तपास केला जात आहे. यापूर्वी अटक करण्यात आलेल्या तिघा संशयीतांसह सर्वांना न्यायालयासमोर हजर केले असता न्यायालयाने पुढील तपासासाठी अशपाक पटवेगार याला सात दिवस तर उर्वरित सर्व संशयितांना पाच दिवस पोलिस कोठडी सुनावली आहे. महात्मा गांधी चौक पोलिस ठाण्याचे सहायक निरीक्षक संदीप शिंदे अधिक तपास करत आहेत.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
