आरगमधील पद्मावती मंदिरात चोरी करणारा जेरबंद
९.५४ लाखांचा मुद्देमाल जप्त, सांगली एलसीबीची कारवाई
सांगली : खरा पंचनामा
मिरज तालुक्यातील आरग येथील पद्मावती मंदीर फोडून त्यातील दागिने लंपास करणाऱ्या पलूस येथील तरूणाला अटक करण्यात आली आहे. त्याच्याकडून चोरीचे सोन्या-चांदीचे दागिने, दुचाकी असा ९.५४ लाखांचा मुद्देमाल जप्त करण्यात आल्याची माहिती एलसीबीचे वरीष्ठ पोलिस निरीक्षक सतिश शिंदे यांनी दिली.
अक्षय अर्जुन मोरे (वय २७, रा. गोंदिलवाडी रेल्वे गेट, पलूस) असे अटक केलेल्याचे नाव आहे. आरग येथील पद्मावती मंदिरात चोरी झाल्याची घटना गुरुवारी सकाळी उघडकीस आली. याबाबत शीतल उपाध्ये यांच्या तक्रारीनुसार मिरज ग्रामीण पोलिस ठाण्यात गुन्हा दाखल करण्यात आला होता. यातील संशयितांना पकडण्यासाठी निरीक्षक शिंदे यांनी सहायक निरीक्षक पंकज पवार यांचे एक पथक तयार केले होते. पथक चोरट्यांचा शोध घेत होते. त्यावेळी श्री. पवार यांना ही चोरी अक्षय मोरे याने केली असून दागिने विक्री करण्यासाठी तो पाचवा मैल परिसरात दुचाकीवरून फिरत असल्याची माहिती खबऱ्याद्वारे मिळाली.
पथकाने पाचवा मैल परिसरात सापळा रचला होता. माहितीप्रमाणे एक तरूण दुचाकीवरून सॅक घेऊन जाताना पथकाला दिसला. पथकाने त्याला अडवले. त्याच्याकडील सॅकमध्ये सोन्या-चांदीचे दागिने सापडले. त्याबाबत कसून चौकशी केल्यानंतर त्याने आरग येथील पद्मावती मंदीर फोडून तेथून दागिने चोरल्याची कबुली दिली. त्याला अटक करून त्याच्याकडील दागिने, दुचाकी असा ९.५४ लाखांचा मुद्देमाल जप्त करण्यात आला. त्याला मिरज ग्रामीण पोलिसांच्या ताब्यात देण्यात आले आहे.
एलसीबीचे वरीष्ठ पोलिस निरीक्षक सतिश शिंदे यांच्या मार्गदर्शनाने सहायक निरीक्षक पंकज पवार, नितीन सावंत, सागर लवटे, संदीप गुरव, महादेव नागणे, मच्छिंद्र बर्डे, अमर नरळे, सचिन धोत्रे, संदीप नलवडे, उदय माळी, विक्रम खोत, संतोष चव्हाण, कॅप्टन गुंडवाडे, विजय पाटणकर, विवेक साळुंखे आदींच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
