सांगलीत प्रतिबंधित ई-सिगरेटचा साठा जप्त
एकाला अटक, एलसीबीची कारवाई
सांगली : खरा पंचनामा
शहरातील दत्त-मारूती रस्त्यावरील एका दुकानातून प्रतिबंधित असलेल्या ई-सिगरेटचा साठा जप्त करण्यात आला. याप्रकरणी दुकानदाराला अटक करून १६ हजारांचा मुद्देमाल जप्त करण्यात आल्याची माहिती एलसीबीचे वरिष्ठ पोलिस निरीक्षक सतिश शिंदे यांनी दिली.
लखन चंद्रकांत मंगलानी (वय ३५, रा. लोंढे कॉलनी, मिरज) असे अटक केलेल्याचे नाव आहे. सांगली शहरात बेकायदा अंमली पदार्थ विक्रेत्यांवर कारवाई करण्यासाठी निरीक्षक शिंदे यांनी सहायक निरीक्षक नितीन सावंत यांचे पथक तयार केले होते. पथकाला शहरातील दत्त-मारूती रस्त्यावरील एका दुकानात ई-सिगरेटची विक्री होत असल्याची माहिती मिळाली. त्यानंतर पथकाने तेथे छापा टाकला.
दुकानाची तपासणी केल्यानंतर तेथे ई-सिगरेटचे ८ बॉक्स आढळून आले. त्याबाबत दुकान चालक लखन मंगलानी याच्याकडे चौकशी केल्यानंतर त्याने एका कंपनीच्या वेबसाईटवरून कॅश ऑन डिलिव्हरी पद्धतीने या सिगरेट मागवल्याची कबुली दिली. प्रतिबंधित सिगरेट जप्त करून मंगलानी याच्याविरोधात सांगली शहर पोलिस ठाण्यात गुन्हा दाखल करण्यात आला आहे.
एलसीबीचे वरिष्ठ निरीक्षक सतिश शिंदे यांच्या मार्गदर्शनाने सहायक निरीक्षक नितीन सावंत, संकेत मगदूम, अतुल माने, प्रतिक्षा गुरव, विनायक सुतार, सोमनाथ पतंगे, अनंत कुडाळकर आदींच्या पथकाने ही कारवाई केली.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
