अनुज्ज्ञप्ती नूतनिकरण शुल्क भरण्यात सांगली जिल्ह्यातील परवानधारक अनुत्साही
दोन दिवसांवर आर्थिक वर्षाखेर तरीही अनेकांनी भरले नाही शुल्क : राज्य उत्पादन शुल्कची धावपळ
सांगली : खरा पंचनामा
आर्थिक वर्षाखेर दोन दिवसांवर येऊन ठेपला तरी जिल्ह्यातील बहुतांशी बिअर बार, देशी दारू दुकान, वाईन शॉप, बियर शॉपी यांनी अनुज्ज्ञप्ती नूतनिकरण शुल्क भरण्याकडे दुर्लक्ष केल्याचे दिसत आहे. त्यामुळे रविवारी गुढी पाडवा, सोमवारी ईद असली राज्य उत्पादन शुल्क विभागाची महसूल उद्दिष्ट पूर्तीसाठी धावपळ सुरु असल्याचे चित्र आहे.
सर्व परवान्यांच्या नूतनिकरण शुल्कमध्ये वाढ करण्यात आली आहे. राज्याच्या तिजोरीत खडखडाट असल्याने हे शुल्क कमी करण्यात येणार नसल्याची भूमिका राज्य शासनाने घेतली आहे. या वाढीच्या निषेधार्थ जिल्ह्यातील परवाना धारकांनी एक दिवस बंद पाळला होता. मात्र शुल्क कमी करण्यात आले नाही. मार्च महिना संपण्यासाठी दोन दिवस राहिले असूनही बहुतांशी परवाना धारकांनी नूतनिकरण शुल्क जमा केलेले नाही.
वर्षाखेरला दोन दिवस राहिल्याने उत्पादन शुल्क विभागाचे अधिकारी उद्दिष्ट पूर्ती करण्यासाठी धावपळ करताना दिसत आहेत. दरम्यान परवाना धारकांच्या संघटनेने येत्या दोन दिवसात शुल्क भरण्याचे आवाहन केले आहे. त्यामुळे रविवारी आणि सोमवारी नूतनिकरण शुल्क भरण्यासाठी गर्दी होण्याची शक्यता आहे.
परवाना धारकांनी वेळेत शुल्क नाही भरल्यास त्यांच्यावर दंडात्मक कारवाई होऊ शकते. त्यामुळे परवाना धारकांकडून येत्या दोन दिवसात नूतनिकरण शुल्क भरले जाण्याची शक्यता आहे.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
