वाद टोकाला गेल्याने पतीने घोटला पत्नीचा गळा
मांगले येथील घटना : मृतदेह ठेवला विद्युत पंपाच्या पेटीत
शिराळा : खरा पंचनामा
शिराळा तालुक्यातील मांगले येथे पतीने पत्नीचा गळा आवळून खून केल्याची घटना उघडकीस आली. पतीने खुनानंतर पत्नीचा मृतदेह विद्युत पंपाच्या पेटीत घालुन ठेवल्याचे उघडकीस आले. खून केल्यानंतर पती स्वतः पोलीस ठाण्यात हजर झाला. याबाबत शिराळा पोलीस ठाण्यात गुन्हा दाखल करण्यात आला आहे.
प्राजक्ता मंगेश कांबळे (वय. २८) असे मृत महिलेचे नाव आहे. तर मंगेश चंद्रकांत कांबळे (रा. मांगले, मुळ रा. कोकरूड) असे पतीचे नाव आहे. मंगेशचा भाऊ निलेश आणि त्याची आई गेल्या पंधरा वर्षापासून मांगले येथे वास्तव्यास आहे. मांगले - वारणानगर रस्त्यावर जोतीबा मंदिराच्या समोर रामचंद्र वाघ यांच्या कौलारू घरात ते भाड्याने राहत आहेत. गेल्या चार दिवसापूर्वी मंगेश त्याची पत्नी प्राजक्ता व सहा वर्षाचा मुलगा शिवम, तीन वर्षाची मुलगी शिवन्या मुंबईहून आई आणि भावाकडे रहायला आले होते. मंगेश आणि प्राजक्ता आज सकाळी भाऊ निलेश आणि आई देववाडी येथे गेले होते. सकाळी दहाच्या दरम्यान पती-पत्नीत वाद झाला होता. तो वाद विकोपाला जाऊन मंगेशने प्राजक्ताचा ओढणीने गळा आवळून खून केला. मृतदेह बाजूच्या खोलीत ठेवलेल्या विद्युत पंपाच्या मोडक्या पेटीत घालून झाकून ठेवला. खोलीला बाहेरून कुलूप घालून, भाऊ निलेश याला फोन करून मी शिराळ्याला जाणार आहे. गाडी घेऊन ये असा निरोप दिला.
त्यानंतर निलेश देववाडीतून मांगलेत आल्यानंतर मंगेशने भावाकडून गाडी घेऊन तो शिराळ्याकडे निघून गेला. ह्याच दरम्यान मंगेशचा सहा वर्षाचा मुलगा शिवम दारातच रडत होता. त्यावेळी निलेशने त्याला काय झाले विचारले त्यावेळी सहा वर्षाच्या शिवमने मम्मी-पप्पांचे दोघांचे भांडण होऊन पप्पांनी आईला मारून खोलीत ठेवल्याचे सांगितले. निलेशने देववाडी येथील येथील बहिणीला आणि तिच्या पतीला बोलवून घेतले. मंगेशला फोन करून गोरक्षनाथ मंदिराजवळच थांब आम्ही येतो म्हणून सांगितले. त्यानंतर गोरक्षनाथ मंदिराजवळ जावून सविस्तर माहिती विचारल्यानंतर त्यांने खून केल्याचे सांगितले.
त्यानंतर या तिघांनीही त्याला आम्हाला त्रास होईल तू पोलिस स्टेशनला जाऊन माहिती दे असे सांगितले. त्यानंतर तो स्वतः शिराळा पोलिसात हजर झाला. दरम्यान दुपारनंतर घटनेची माहिती मिळाल्यावर ज्योतिबा मंदिरा शेजारी वाघ यांच्या घरासमोर लोकांनी गर्दी केली. होती शिराळा पोलिसांनी मयत प्राजक्ताच्या आईला व इतर नातेवाईकांना घटनेची माहिती दिली.
शिराळा पोलीस ठाण्यात प्राजक्ताची आई रजनी जाधव यांनी फिर्याद दिली आहे. अधिक तपास शिराळा पोलीस ठाण्याचे निरीक्षक सिद्धेश्वर जंगम करीत आहेत.
कार्यकारी संपादक - श्री. अभिजीत बसुगडे -- जाहिरात व बातम्यांसाठी : +९१ ९८८१४ ००९०२
➤ वाढवा आपला व्यवसाय / वेब पोर्टल्स करिता इथे क्लिक करा.Call :- 9890 546 909.
